Կենտրոնական հովտի հայերը հատուկ արարողությամբ տվել են Հայոց ցեղասպանության հարյուրամյակին նվիրված հուշարձանի կառուցման մեկնարկը, գրում է asbarez.com-ը:
Կիրակի՝ նոյեմբերի 2-ին, համայնքի հարյուրավոր անդամներ հավաքվել են Ֆրեզնոյի Մեփլ Մոլում, որտեղ հուշարձանի կառուցումն ավարտին կհասցվի մինչ 2015 թվականի ապրիլի 24-ը։ Նոյեմբերի 2-ի իրադարձության գլխավոր հատվածը եղել է Հայաստանից բերված հողակտորների օրհնումը, որոնք այնուհետ ուսանողները դրել են այն հատվածում, որտեղ պետք է կառուցվի ապագա հուշարձանը:
Ֆրեզնոյում բնակվող ճարտարապետ Փոլ Հալաջյանի կողմից նախագծված հուշարձանը մարմնավորելու է մշակութային իմաստների խորհրդանիշները հայ ժողովրդի համար: Դրա գլխավոր բաղադրիչները դասավորվելու են շրջանաձև և թեքված դեպի ներս՝ հիշեցնելով Ծիծեռնակաբերդի հուշահամալիրը:
Ինը սյուները խորհրդանշելու են պատմական Արևմտյան Հայաստանի վեց շրջանները, Կիլիկիան, Սփյուռքը և Հայաստանի Հանրապետությունը: Սյուների վերևում տեղադրվելու է անավարտ շրջան, որը խորհրդանշելու է ինչպես Ցեղասպանության թողած ճեղքը, այնպես էլ հայ ժողովրդի միասնությունը:
