«Իրաքի եւ Լեւանտի իսլամական պետություն» (ԻԼԻՊ) ահաբեկչական խմբավորման դեմ կռվող քուրդ աշխարհազորայինները վերջին 24 ժամվա ընթացքում 86 ջիհադական իսլամիստների են ոչնչացրել սիրիական Քոբանի քաղաքում:
Այս մասին հայտնում է Firat լրատվական գործակալությունը:
Ջիհադական իսլամիստները զավթված Ռաքայի, Մանբաջի, Ջարաբլուսի եւ Թել-Աբյադի իրենց բազաներից օգնական ուժեր են ուղարկել Քոբանի:
Նշվում է, որ Քոբանիում ԻԼԻՊ-ի դեմ պայքարող մոտ 2 հազար քուրդ աշխարհազորայիններից 400-ը ներկայում կենաց եւ մահու կռիվներ են մղում դեպի քաղաքապետարան տանող Ազադի փողոցում:
Քուրդ աշխարհազորայիններին օգնելու համար իրաքյան Քրդստանից սիրիական սահմանում գտնվող թուրքական Սուրուչ եկած փեշմերգա ուժերը դեռեւս չեն կարողանում իրենց բերած ծանր զենքերն ու սպառազինությունը տեղափոխել Քոբանի, քանի որ ԻԼԻՊ-ի մարտիկները վերահսկում են դեպի քաղաք տանող ճանապարհի վրա գտնվող մի շարք բարձունքներ:
Firat-ը հաղորդել է, որ քրդական ժողովրդական կոմիտեները կոչ են արել նոյմեբերի 1-ին ամբողջ աշխարհում միտինգներ եւ ցույցեր անցկացնել ի պաշտպանություն Քոբանիի քրդերի:
«Սիրիացի քրդերը` ինչպես Եվրոպայի ժողովուրդները, որոնք դիմակայել են հիտլերիզմին Երկրորդ համաշխարհային պատերազմում, այսօր պայքարում են իրենց ազատ եւ արժանապատիվ կյանքի համար` հետ մղելով իսլամիստ ծայրահեղական հրոսակների գրոհները», -ասվում է կոչում: Քրդական ժողովրդական կոմիտեները կոչում դատապարտել են քրդերի նկատմամբ Անկարայի պաշտոնական շրջանակների թշնամական քաղաքականությունը:
ԻԼԻՊ-ը, որը ներկայում իրեն անվանում է «Իսլամական պետություն», Իրաքում ստեղծվել է 2003 թվականին: 2004-2006 թվականներին այդ ահաբեկչական կազմակերպությունը գլխավորել է Աբու Մուսաբ ալ Զարգավին: Նրա կազմում եղել են 11 արմատական իսլամական խմբավորումներ, որոնք սերտ կապեր են ունեցել «Ալ Կաիդա» ահաբեկչական կազմակերպության հետ:
2013 թվականին Սիրիայում զինված ընդդիմության եւ կառավարական ուժերի միջեւ դիմակայություն սկսվելուց հետո «Իսլամական պետությունը» թափանցել է երկրի տարածք: Դրանից հետո կազմակերպությունը հայտարարել է այն մասին, որ հրաժարվում է հավատարմության երդում տալ «Ալ Կաիդային» եւ ջիհադ է հայտարարել բոլոր խմբավորումներին, ինչպես նաեւ կառավարական ուժերին:
Սիրիայում «Իսլամական պետության» ուժեղանալը հանգեցրել է նրան, որ այն կարողացավ վերադառնալ Իրաք` ռազմական գործողություններ սկսելով այդ երկրի կառավարական ուժերի դեմ:
Այս տարվա հունիսի վերջին «Իսլամական պետությունը» հայտարարել է Իրաքում եւ Սիրիայում իր վերահսկողության տակ վերցրած տարածքներում Իսլամական խալիֆայություն ստեղծելու մասին:
