Ռուսաստանի նախագահի մամուլի խոսնակ Դմիտրի Պեսկովը հայտարարել է, որ Վլադիմիր Պուտինը պատրաստ է հանդիպել Վրաստանի նախագահ Գեորգի Մարգվելաշվիլիի հետ, գրում է gazeta.ru-ն:
«Վրացական կողմից պետք է համապատասխան քաղաքական կամք լինի: Նախագահը պետք է իր խոսքն ասի: Պուտինը հասկանալի հայտարարել է, որ եթե Վրաստանից ազդանշան ստանա, հանդիպումը կկայանա»,- հայտարարել է Պեսկովը վրացական «Իմեդի» հեռուստաընկերությանը տված հարցազրույցում:
Իր հերթին, Վրաստանի նախագահի նախկին խորհրդական Վանո Մաչավարիանին ավելի վաղ հայտարարել է, որ նախագահական գրասենյակում պատրաստվում էր Գեորգի Մարգվելաշվիլիի հանդիպումը Ռուսաստանի նախագահ Վլադիմիր Պուտինի հետ, բայց այն տեղի չի ունեցել:
Ռուսաստանի հետ հարաբերությունների հարցերով Վրաստանի վարչապետի հատուկ ներկայացուցիչ Զուրաբ Աբաշիձեն հայտնել է, որ Ռուսաստանի արտաքին գործերի նախարարի տեղակալ Գրիգորի Կարասինի հետ իր երկխոսության ձևաչափը վերանայման ենթակա չէ:
Ավելի վաղ Վրաստանի նախագահը հայտարարել է Ռուսաստանի հետ ռացիոնալ երկխոսության պատրաստակամության մասին: