«Բարձրաձայնում» ծրագրի շրջանակներում այսօր «Մոսկվա» կինոթատրոնի հարակից տարածքում տեղի ունեցավ «Ո ́չ Թուրքիայում հանգստին» ակցիա, որի ընթացքում կազմակերպիչներն անցորդներին կոչ արեցին չմեկնել Թուրքիա հանգստի:
Ակցիայի շրջանակներում անցորդներին նաև առաջարկեցին լուսանկարվել հատուկ պաստառի մոտ: Լուսանկարները կտեղադրվեն «Բարձրաձայնում» ֆեյսբուքյան էջում:
Նոյեմբերի 22-ին Հայաստանի երիտասարդական հիմնադրամի՝ ՀՀ նախագահի կողմից ընտրված գործընկեր կազմակերպության և «Ոչ պետական բուհերի ուսանողական կենտրոն» ՀԿ նախաձեռնությամբ մեկնարկեց Ցեղասպանություն և մշակույթ» անվանակարգում դրամաշնորհ շահած «Բարձրաձայնում» ծրագիրը:
«Առանձնակի տեղ է հատկացված Ցեղասպանության տարելիցին ընդառաջ ծրագրերի համար, դրանցից մեկն այս ծրագիրն է: Հանձնաժողովի կողմից այս ծրագիրը միաձայն անցավ: Առաջին հայացքից թվում է, թե ինչ կապ ունի Թուրքիայում հանգստանալը Ցեղասպանության տարելիցի հետ։ Իրականում կապ ունի, ամեն դեպքում Հայաստանից գումար է դուրս գալիս և գնում Թուրքիա»,-լրագրողների հետ զրույցում ասաց ՀԵՀ հոգաբարձուների խորհրդի համակարգող, ԱԺ պատգամավոր Կարեն Ավագյանը:
Ծրագրի նախաձեռնողները այցելել են նաև զբոսաշրջային գործակալություններ՝ կոչ անելով նվազագույնի հասցնել դեպի Թուրքիա հանգստի և ժամանցի նպատակով մեկնողներին տրամադրվող փաթեթների վաճառքը:
«Եղել է գաղափարը, դիմել ենք և շահել: Ծրագիրը բավականին լայն տարածում է ստացել, մենք դասընթացներ ենք իրականացրել, այցելել ենք տուրիստական կազմակերպություններ, այսօր որոշել ենք ֆլեշմոբ իրականացնել և ներգրավել քաղաքացիներին»,-ասաց «Ոչ պետական բուհերի ուսանողական կենտրոն» ՀԿ նախագահ Արմինե Բարսեղյանը՝ ավելացնելով, որ կազմակերպությունը նման ակցիայով սթափեցման կոչ է անում ՀՀ քաղաքացիներին: