Սովետական միության ժամանակ` լճացման տարիներին, մի անեկդոտ կար:
Այդ տարիներին հեռուստատեսության որ ալիքը միացնում էիր Լեոնիդ Իլյիչ Բրեժնևն էր, թերթերում նույնպես,փողոցում, պաստառների վրա, ամենուր նա էր: Անեկդոտում ասվում էր, որ երբ մտնում ես արտաքնոց և բարձրացնում զուգարանակոնքի կափարիչը նորից Բրեժնևն է:
Այս նույն իրավիճակն է տիրում հիմա ՀՀ ամենաաճպարար բանկերից մեկի՝ Յունիբանկի, մոտ: Վերջինիս գովազդը տեղադրված է մոտ 30 կայքերում, պաստառները ամենուր են, թերթերում նույնպես Յունիբանկն է, հեռուստատեսությունը ողողված է Յունիբանկի գովազդով:
Ճիշտն ասած, արտաքնոցները չենք ստուգել, ուստի վստահաբար ոչինչ ասել չենք կարող այդ կապակցությամբ:
Ամենահետաքրքիրն այն է, որ բանկը չի գովազդում իր կողմից տրամադրվող վարկերը կամ դրանց պայմանները,այլ գովազդում է աստղաբաշխական տոկոսներով ավանդները՝ այսինքն բանկի ամբողջ գովազդն ուղղված է ազգաբնակչությունից փող հավաքելուն:
Այս ամենը կատարվում է այն դեպքում, երբ բոլորին հայտնի է, որ բանկերն Ամանորին դրամի արժեզրկումից հետո գրեթե վարկ չեն տրամադրում, ուստի հարց է առաջանում, թե ինչի՞ համար է այդքան գումար հավաքում Յունիբանկը և ի՞նչ նպատակով:
Միգուցե ՀՀ բնակչության փողերով փորձում է փակե՞լ Կիպրոսում ճգնաժամի հետևանքով առաջացած ճեղքվածքը: Հնարավոր է: Իսկ միգուցե Յունիբանկի կառավարիչները նորի՞ց են գողացել ավանդատուների փողերը:
Ի դեպ, ըստ հավաստի տեղեկությունների, Յունիբանկի Ավանի մասնաճյուղի կառավարիչը նույնպես խոշոր գումարներ է հափշտակել բանկից և այս պահին այդ կապակցությամբ քրեական գործ է քննվում:
Շարունակելի