Հայոց ցեղասպանության փոխհատուցման տրամադրման հարցերի ուսումնասիրությամբ զբաղվող խումբը (The Armenian Genocide Reparations Study Group) հրապարակել է վերջնական զեկույց, որն իրենից ներկայացնում է իրավական, պատմական, քաղաքական ու էթիկական առումներով Ցեղասպանության փոխհատուցման համապարփակ վերլուծություն:
Ինչպես նշում է asbarez.com-ը, 2014թ. սեպտեմբերին խումբն ավարտին է հասցրել զեկույցը, սակայն այն ժամանակ ներկայացվել է միայն նախաբանը: Իսկ այժմ զեկույցի ամբողջական տարբերակն արդեն հրապարակվել է ու հասանելի է ներբեռնման համար (սեղմել՝ այստեղ):
Աղբյուրը մանրամասնում է, որ խումբը ձևավորվել է 2007թ.` իր մեջ ներառելով փոխհատուցման հարցի տարբեր ոլորտները ներկայացնող 4 փորձագետի: Խմբի առաքելությունն է կազմել Հայոց ցեղասպանությանը վերաբերող փոխհատուցումների` իր տեսակի մեջ առաջին համապարփակ վերլուծությունը:
Պարբերականը հավելում է, որ անցած մի քանի տարվա ընթացքում Ցեղասպանության փոխհատուցման հարցը դուրս է եկել 2-րդական դերից ու կենտրոնական դիրք գրավել գիտական տարբեր շրջանակներում:
