Հայաստանի Հանրապետության՝ Եվրասիական տնտեսական միությանը միանալու առնչությամբ Առեւտրի համաշխարհային կազմակերպության անդամների հետ բանակցություններ են անցկացվում ՀՀ-ի համապատասխան սակագնային պարտավորությունների փոփոխման վերաբերյալ:
Այս մասին նշված է Եվրասիական տնեսական միությանը Հայաստանի անդամակցության պայմանագրում:
Նշված բանակցություններն անցկացվում են դրա համար լիազորված պատվիրակության հրահանգների հիման վրա: Պատվիրակության կազմը եւ հրահանգները հաստատվում եւ, անհրաժեշտության դեպքում, ճշգրտվում են Եվրասիական տնտեսական հանձնաժողովի խորհրդի կողմից:
Բանակցությունների արդյունքում ձեռք բերված պայմանավորվածությունները՝ մինչեւ Առեւտրի համաշխարհային կազմակերպությունում դրանց վերջնական ընդունումը, հավանություն են ստանում Եվրասիական տնտեսական հանձնաժողովի խորհրդի կողմից:
Նշված պայմանավորվածություններին համապատասխան` Եվրասիական տնտեսական միության Միասնական մաքսային սակագնում կատարվում են համապատասխան փոփոխություններ:
Հայաստանի Հանրապետության՝ Առեւտրի համաշխարհային կազմակերպությանն անդամակցության Աշխատանքային խմբի զեկույցում ընդգրկված ՀՀ պարտավորությունները չեն տարածվում Եվրասիական տնտեսական միության մյուս անդամ պետությունների վրա:
