Կենտրոնական Եվրոպայի որոշ երկրներ կրկին հայտարարել են ռուսական գազի մատակարարման ծավալների կրճատման մասին՝ շարունակվող ուկրաինական ճգնաժամի ֆոնին, գրում է gazeta.ru-ն՝ հղում անելով The Wall Street Journal-ին:
Մասնավորապես, E-Control ավստրիական էներգետիկ կարգավորիչը հայտնել է, որ ուրբաթ կրճատումը կազմել է 25 տոկոս: Դա ներկայիս դրությամբ Ավստրիայի համար ամենամեծ ցուցանիշն է, նշում է թերթը: E-Control-ում ընդգծել են, որ հաջորդ օրը գրանցվել է գազամատակարարման աճ, և շաբաթ օրն անկումը կրճատվել է մինչև 20 տոկոս, մինչդեռ տարվա այդ ժամանակի համար նորմալ է համարվում 10-15 տոկոսի ցուցանիշը:
Ավելի վաղ հաղորդվել է, որ Սլովակիայում ռուսական գազի ստացող և դիստրիբյուտոր Slovensky plynarensky priemysel (SPP) ընկերությունն Ուկրաինայի տարածքով 20 տոկոսով քիչ ռուսական գազ է ստացել:
Ե՛վ Ավստրիայում, և՛ Սլովակիայում ընդգծում են, որ ներքին սպառողների գազամատակարարման հարցում խափանումներ չկան:
Բացի այդ, լեհական գազատրանսպորտային Gaz System ընկերությունը հայտարարել է, որ ռուսական «Газпром»-ը շարունակում է ավելի քիչ գազ մատակարարել, քան պատվիրվել է:
Ռուսական գազի մատակարարման ծավալների կրճատման մասին հաղորդվել էր նաև ավելի վաղ: