«Իսրայելի գերխնդիրը Մերձավոր Արևելքը քրիստոնյաններից ազատելն է և Գազայի հատվածում կատարվող ռազմական գործողությունները ընդամենը պրովակացիա են»,-այսօր «Անալիտիկ» կենտրոնում տեղի ունեցած ասուլիսի ժամանակ ասաց Իսրայելից օրերս ժամանած քաղաքական մեկնաբան Աշոտ Բալասանյանը:
Բանախոսը խոսելով արաբաիսրայելական հակամարտության մասին, ասաց. «Մերձավոր Արևելքում բավական լարված իրավիճակ է տիրում: Ռազմական գործողությունների պատճառով արաբական թաղամասերում կան զոհեր, այն, որ իրավիճակը դեռ երկար ժամանակ անկայուն կմնա, պարզ է, քանի որ կողմերը կոմպրոմիսային քայլեր անելուն հակված չեն»:
Խոսելով Իսրայելում հայ համայնքի մասին, բանախոսը նշեց. «Այժմ Իսրայելում բնակվում է չորսից հինգ հազար հայ: Պատերազմական գործողությունների պատճառով արտագաղթ է տեղի ունենում: Հայկական համայնքը համարվում է ծերացած համայնք: Պատրիարքարանը նույնպես աջակցության կարիք ունի և ոչ մի բան չի կարող անել այս հարցում: Այն, գտնվելով Իսրայելի տարածքում, մասամբ քաղաքականացված է: Հայաստան վերադարձողներ չկան, խնդիրը լեզուն է, քանի որ արաբերեն, եբրայերեն լեզուներ են սովորում: Համայնքում ծնված բոլոր հայ աղջիկներն ու տղաները, քրիստոնյա լինելու պատճառով, ազատվում են բանակում ծառայելուց և նրանց, նորից կրոնի պատճառով, աշխատանք չի տրվում, այդ պատճառով էլ հայ երիտասարդների շրջանում արտագաղթը մեծ է»:
Իսկ ինչ վերաբերում է գերտերություններին, ապա Ամերիկան աջակցում է Իսրայելին, իսկ Ռուսաստանը Պաղեստինին, Իրանը մնում է չեզոք դիրքում:
