Հասարակություն 

Դասագրքերի օգտագործման և պահպանման նկատմամբ կսահմանվի հատուկ հսկողություն

analitik.am

Երևանի քաղաքապետի համապատասխան հանձնարարականի շրջանակում ուսումնական տարվա մեկնարկից դպրոցներում հատուկ հսկողություն է իրականացվում դրամահավաքության, ինչպես նաև դպրոցներում տետրերի, օրագրերի և ուսումնաօժանդակ այլ իրերի վաճառքի հնարավոր դեպքերը բացառելու ուղղությամբ: Երևանի քաղաքապետարանում տեղի ունեցած աշխատանքային հերթական խորհրդակցության ժամանակ հանրակրթության վարչության պետը զեկուցել է, որ հսկողության արդյունքում որևէ դեպք չի հայտնաբերվել:

 

Քաղաքապետը հանձնարարել է շարունակել ամենօրյա հսկողությունն ու արդյունքների մասին պարբերաբար զեկուցել:


Անդրադառնալով հանրակրթական որոշ դպրոցների կնիքով դասագրքերի վաճառքում հայտնվելու վերաբերյալ օրեր առաջ լրատվամիջոցներով հնչած ահազանգին՝ քաղաքապետ Տարոն Մարգարյանը պատասխանատուներին հանձնարարել է հատուկ հսկողություն սահմանել դասագրքերի օգտագործման և պահպանման նկտամամբ, նաև օպերատիվ միջոցառումներ ձեռնարկել արձանագրված դեպքը բացահայտելու ուղղությամբ:


«Նախորդ շաբաթ մամուլում տեղեկություններ հրապարակվեցին հանրակրթական դպրոցների կնիքով դասագրքերի վաճառքի մասին, ինչը մտահոգիչ է ու պահանջում է հրատապ քայլեր ձեռնարկել այս ուղղությամբ: Որևէ մեկն իրավունք չունի վաճառել դասագրքերի շրջանառու հիմնադրամի կողմից վարձակալական հիմունքներով դպրոցներին տրամադրված դասագրքերը: Ըստ այդմ, ուսումնասիրեք խնդիրն ու ձեռնարկեք անհրաժեշտ բոլոր քայլերը մեկ օր շուտ դեպքը բացահայտելու ուղղությամբ, ինչը, համոզված եմ, կկանխի գրքերի վաճառքի հետագա փորձերը: Ուսումնասիրություններից և ստուգայցերից հետո, անհրաժեշտության դեպքում, նյութերն ուղարկեք ոստիկանություն»,- ընդգծել է քաղաքապետ Տարոն Մարգարյանը:

Նույն շարքից