Արևմուտքը պետք է համագործակցի Ռուսաստանի հետ իսլամական ծայրահեղականության դեմ պայքարի հարցում, կարծում է Մեծ Բրիտանիայի նախկին վարչապետ Թոնի Բլեերը, փոխանցում է Взгляд-ը։
Բլեերը մտադիր է այսօր ելույթ ունենալ Bloomberg ամերիկյան տեղեկատվական գործակալության լոնդոնյան գրասենյակում։ Նրա ելույթը նվիրված կլինի ծայրահեղական իսլամիզմի խնդիրներին։
«Արևմուտքը պետք է մի կողմ դնի Ռուսաստանի հետ Ուկրաինայի հարցում ունեցած տարաձայնությունները, որպեսզի ուշադրությունը կենտրոնացնի ծայրահեղական իսլամի սպառնալիքին դիմակայելու վրա»,- ասել է Բլեերը։
Նախկին վարչապետը կարծում է, որ միջազգային անվտանգության համար ամենամեծ սպառնալիքն «իսլամի ծայրահեղականացված և քաղաքականացված տարբերակն է, գաղափարախոսություն, որը խեղաթյուրում է իսլամական ուսմունքի իրական բովանդակությունը»։
«Ծայրահեղական իսլամի սպառնալիքը չի նվազում։ Այն աճում է։ Այն տարածվում է ամբողջ աշխարհում։ Այն ապակայունացնում է համայնքները և ամբողջ երկրներ։ Այն խանգարում է խաղաղ գոյատևմանը գլոբալացման ժամանակաշրջանում»,- նշել է Թոնի Բլեերը։
