Թուրքիայի նախագահ Աբդուլլահ Գյուլն ապագայի համար քաղաքական ծրագրեր չունի. ինչպես տեղեկացնում է թուրքական «Զաման» օրաթերթի կայքը, այդ մասին նա ասել է լրագրողների հետ զրույցում։
«Այս պահին ապագայի վերաբերյալ կոնկրետ քաղաքական նպատակներ չունեմ»,- ասել է Գյուլը։
Թուրքիայում օգոստոսին ակնկալվող նախագահական ընտրություններին ընդառաջ երկրում ակտիվացել են խոսակցությունները, թե վարչապետ Ռեջեփ Թայիփ Էրդողանի՝ նախագահ ընտրվելու դեպքում Գյուլը կարող է զբաղեցնել երկրի վարչապետի պաշտոնը։
Թուրքիայում վերջերս կայացած տեղական ինքնակառավարման մարմինների ընտրություններում Էրդողանի կուսակցության հաղթանակից հետո նա համարվում է Թուրքիայի նախագահի պաշտոնի հիմնական հավակնորդը։
Թուրքիայում նախագահական ընտրությունները նշանակված են 2014թ.-ի օգոստոսի 10-ին։ Երկրորդ փուլի անհրաժեշտության դեպքում դա տեղի կունենա օգոստոսի 24-ին։
