Այսօր ժամը 00:30-ի սահմաններում սպանվել է Ռուսաստանում հայտնի քաղաքական ընդդիմադիր գործիչ Բորիս Նեմցովը: РБК-ն գրում է, որ նա քայլելիս է եղել իր ընկերուհու հետ, կանգնել է մեքենա, որից դուրս է եկել մի մարդ և չորս անգամ կրակել Նեմցովի վրա: Այս մասին պատմում է Իլյա Յաշինը:
ՆԳՆ պաշտոնական ներկայացուցիչ Ելենա Ալեքսեևնան հայտնել է, որ Նեմցովի հետ աղջիկ է եղել՝ ուկրաինուհի: Այժմ նրան հարցաքննում են:
Սպանության հանգամանքները դեռևս չեն մանրամասնում: Հանցագործության վայր է ժամանել ՌԴ ՆԳ նախարարը՝ Վլադիմիր Կոլոկոլցևը, ով հայտնել է , որ գործը վերցնում է իր անձնական հսկողության տակ: Հարուցվել է քրեական գործ:
Հանցագործության վայր են եկել Նեմցովի կողմնակիցները՝ այդ թվում կառավարության նախկին ղեկավար Միխային Կասյանովը, ով ասել է լրագրողներին. «Սա երևակայության սահմաններից դուրս է: Կրեմլի պատերից 50 մետր այն կողմ ընկած է իմ ընկերը՝ Բորիս Նեմցովը: Ռուսաստանը հասել է այն օրվան, որ մարդկանց սպանում են հենց Կրեմլի : Սա շոկ է, ինչպե՞ս կարող է Ռուսաստանը հասած լինել սրան»:
Յաշինի կարծիքով սպանությունը քաղաքական նպատակով է կատարվել. «Նեմցովին պարբերաբար սպառնում էին: Վերջին շրջանում նա աշխատություն էր պատրաստում «Պուտին: Պատերազմ» վերնագրով: Այնտեղ հավաքված էին փաստեր, որոնք ապացուցում էին ռուս զինված ուժերի մասնակցությունը Ուկրաինայի զինված բախումներին»:
РИА Новости-ն հայտնում է, որ ՌԴ նախագահ Պուտինը կարծում է, որ ընդդիմադիր քաղաքական գործչի սպանությունը պատվեր և բացառապես պրովոկացիա է: Այս մասին տեղեկացնում է ՌԴ նախագահի մամուլի խոսնակ Դմիտրի Պեսկովը:
Վերջինիս խոսքով Պուտինը խորապես ցավակցում է Նեմցովի հարազատներին և ընկերներին: Պուտինը ՌԴ քննչական կոմիտեի ղեկավար Ալեքսանդր Բաստրիկինին, ՆԳ նախարար Վլադիմիր Կոլոկոլցևին և ֆեդերալ անվտանգության ծառայության պետ Ալեքսանդր Բորտնիկովին հանձնարարել է քննչական խումբ ստեղծել և հսկել քննչական գործողությունները: Պեսկովի փոխանցմամբ, Նեմցովի սպանության մասին անմիջապես հայտնել են Պուտինին:
Ավելի վաղ, Նեմցովը հայտարարել էր, որ վախենում է, քանզի մտածում է, որ Պուտինն իրեն կսպանի:
