Ինչպես ամեն տարվա մայիսի 1-ին՝ այսօր Երևանի կենդանաբանական այգին բացեց իր դռները: Այգու բացմանը ներկա գտնվեց Երևանի քաղաքապետ Տարոն Մարգարյանը, ով սովորության համաձայն իր երեխաներին բերել էր այգի:
Շրջելուց հետո analitik.am-ի հետ քաղաքապետը կիսվեց իր տպավորություններով:
-Ի՞նչ կասեք կենդանաբանական այգու ներկա վիճակի մասին:
-Տպավորություններս լավն են, բայց ես ցանկանում եմ մեր կենդանաբանակ այգին ավելի լավը տեսնել: Արդեն հասցրեցի զբոսնել կենդանաբանական այգում, դեռ անելիքներ շատ կան:
-Ի՞նչ աշխատանքներ են հիմա տարվում: Մենք ե՞րբ կունենանք մեր երազած կենդանաբանական այգին:
-Աշխատանքները բաժանել ենք 3 փուլի: Այս տարի հատկացրել ենք 300 միլիոն դրամ այգու վերանորոգման աշխատանքների համար: Հաջորդ տարիներին կավելացնենք միջոցները, որպեսզի ամբողջությամբ վերանորոգվի: Մի քանի տարի ևս, և մենք կունենանք միջազգային նորմերին համապատասխան կենդանաբանական այգի: Կարծում եմ՝ 3 տարի հետո արդեն կունենանք այնպիսի այգի, ինչպիսին բոլորս ենք ուզում տեսնել՝ թե՛ պայմանների, թե՛ կենդանատեսակների առումով:
-Որքանով մենք գիտենք նախատեսվում է այգու տարածքը ավելի մեծացնել. կա՞ նման նախագիծ:
- Այո նախատեսվում է, բայց ասեմ, որ տարածքն ի սկզբանե ավելի մեծ է եղել ՝ 34 հեկտար, բայց հիմա 14 հեկտարի սահմանում է միայն գործում: Հաջորդ տարիների ընթացքում 6 հեկտարով կավելանա, բայց վերջնական վիճակում այգին չի անցնի իր 34 հեկտարի սահմանները:
Արմինե Բրսոյան